ՈՍԿԵՊԱՐԻ ՀԻՆ ԿԱՄՈՒՐՋ
25.07.2013 17:49
Գտնվում է Ոսկեպար գյուղից շուրջ 3,5 կմ արևմուտք` համանուն գետի վրա` ծովի մակերևույթից 822 մ բարձրության վրա (N 41°03.33.60´´; E 045°00.46.20´´):
Կամրջի թռիչքը 7,70 մ է, անցուղու լայնությունը՝ 3 մ, իսկ բարձրությունը՝ 6,40 մ: Կառուցված է տեղական անմշակ քարով և կրաշաղախով: Թաղն ունի փոքր-ինչ փռված, անկանոն կամարի տեսք:
Նախատեսված է եղել միայն հետիոտնի և հեծյալի համար, ուստի ի սկզբանե կամրջի անցուղին եզրապատեր չի ունեցել (արդեն կամրջի սահմանափակ լայնությունն իսկ վկայում է, որ այն սայլի կամ կառքի փոխադրության համար նախատեսված չի եղել):
Հորինվածքային, կառուցողական և շարվածքային առանձնահատկությունները բնորոշ են ԺԳ դարի շինարվեստին: