ԴՍԵՂԻ ԳԵՐԵԶՄԱՆՈՑ
Տեղադրություն. գտնվում է գյուղամիջում` շրջափակված բնակելի տներով: Ծովի մակերևույթից բարձր է 1218 մ (N 40՛57՛33.60՛՛; E 044՛38՛59.28՛՛): Ընդգրկում է մոտ 6000 քմ մակերես:
Պատմություն. առկա գերեզմանական տարաբնույթ հուշարձանները վկայում են, որ տեղում գրեթե առանց ընդհատումների իրականացվել են թաղումներ` սկսած առնվազն վաղ միջնադարից մինչև ԺԹ դարը:
Նյութական մշակույթի հուշարձանները. հնավայրում պահպանվել են վաղմիջնադարյան քառակող կոթողներ, զարգացած միջնադարից մինչև ուշ միջնադարի ընդգրկումով պարզ և գեղաքանդակ բազմաթիվ խաչքարեր, վերջիններիցս մնացած մեծաթիվ պատվանդաններ, բազմաոճ (սալաձև, ուղղանկյունաձև, վրանաձև և այլն) տապանաքարեր: Գերեզմանական հուշարձանների զգալի մասն արձանագիր է:
Առավել ակնառու է նախնական տեղում պահպանված Զ-Է դարերով թվագրվող քանդակազարդ քառակող կոթողը, որի պատվանդանի հարավային նիստին ԺԳ դարում հավելվել է 5 տողանի արձանագրություն: Ի դեպ, հիշվում է Մամիկոնյան Վահրամ իշխանը, իսկ գրիչն է Մխիթարիչը:
Գեղարվեստական բարձրարվեստ մշակմամբ աչքի է ընկնում քարգործ-վարպետ Վահրամի` 1281 թ. կերտած Ամենափրկիչ խաչքարը, որը կանգնեցրել է Խալիլի որդի Տերունը եղբայրների հետ: Նրբագեղ խաչքարի արևմտահայաց երեսի կենտրոնում քանդակված է Գողգոթայի վրա կանգնած խաչը` խաչված և գլուխը դեպի աստվածամայրն ուղղած Քրիստոսի պատկերով: Հիսուսից աջ` առասպելական թռչունի վրա, արևի, իսկ ձախ` ցլի վրա, լուսնի պատկերաքանդակներն են: Խաչի ստորին մասում պատկերված է Ադամի գլուխը, քիվին` Համբարձման տեսարանը: Բազմատող արձանագրությունը զետեղված է խաչքարի մակերեսին և պատվանդանին:
Գերեզմանոցի հյուսիսային եզրին պահպանվել են նաև վաղմիջնադարյան եկեղեցու մնացորդներ: Հնավայրի ողջ տարածքում հանդիպում են նաև ճարտարապետական առանձին այլ բեկորներ` կիսագլանաձև ծածկասալեր և երեսապատի սրբատաշ քարեր: