Երկամյա աշխատանքի ամփոփում
Ակումբների անդամները ծրագրի շրջանակներում նաև մասնակցեցին շատ տարբեր միջոցառումների, փառատոնների, դիմակահանդեսների, ամառային ճամբարի, որոնք լավ հնարավորություն էին ցույց տալու իրենց գիտելիքներն ու հմտությունները, ներկայանալու հանրությանը, սոցիալական կապեր ստեղծելու, սոցիալ-մշակութային կյանքի ակտիվացմանը և ինչ-որ խնդիրների վերհանմանն ու որոշ դեպքերում նաև լուծմանը:
Ծրագրի կարևորագույն նվաճումներից էր նաև այն, որ համայնքային ակումբների մասնակից երիտասարդները որոշակի գիտակցական մակարդակի հասան, որ ոչ միայն չի կարելի փչացնել, կեղտոտել, ոչնչացնել մշակութային արժեքները, այլ նաև պետք է հոգ տանել դրանց նկատմամբ, մաքուր պահել դրանք և հարակից տարածքները, խրախուսել այլ մարդկանց ևս լինել հոգատար: Երեխաները հաճախ էին ծրագրի շրջանակներում կամ դրանից անկախ կազմակերպում աղբահավաքներ, ծառատունկեր և այլ միջոցառումներ, որոնք կխրախուսեին այլ երիտասարդների ևս ճանաչել և պահպանել մշակութային արժեքներն ու առհասարակ իրենց համայնքները:
Ծրագրի առանցքային դասընթացներից էին ֆոտո, վիդիո, ֆիլմերի պատրաստման և լրագրության դասընթացները: Երիտասարդներն ունեին բլոգ, որտեղ ամեն շաբաթ գրառումներ էին կատարում իրենց անցած դասընթացների ու կատարած աշխատանքների մասին: Ծրագրի շրջանակներում նրանք նկարահանեցին ֆիլմեր իրենց համայնքներում առկա մշակութային, բնապահպանական և սոցիալական խնդիրների վերաբերյալ: Ֆիլմերը բավականին հետաքրքիր էին և հստակ ցույց էին տալիս երիտասարդներինն անհանգստացնող խնդիրները: Դրանք նաև մասնակցեցին «Արևորդի» փառատոնին, որտեղ Ալավերդու «SOS Մշակույթ» ակումբի ֆիլմը հաղթող ճանաչվեց, իսկ մյուս ֆիլմերն արժանացան մրցանակների տարբեր նոմինացիաներում: Երիտասարդներն ունեցան նաև ֆոտոցուցահանդես, որտեղ ներկայացվեցին այս երկու տարիների ընթացքում կատարված նրանց լավագույն աշխատանքները:
Ծրագրի արդյունքում տպագրվեցին Մշակութային ժառանգության կրթության ձեռնարկ, Միջմշակութային հաղորդակցության վարժությունների ձեռնարկ, Հայրենասիրական ձեռնարկ, Ոսկեպար և Ջիլիզա գյուղերի մշակութային արժեքների մասին պատմող գրքեր և Լոռվա ու Տավուշի մարզերի տուրիստական քարտեզներ:
«SOS Մշակույթ» թիմի աշխատանքների շնորհիվ Բարձրաքարշ Սուրբ Գրիգոր վանքը ներառվեց «Համաշխարհային հուշարձան դիտարկողի» (WMW) 2014 թվականի ցանկում:
Այժմ ծրագիրն ավարտվել է, սակայն մենք ունենք ակտիվ ու հետաքրքրված երիտասարդներ հեռավոր սահմանամերձ մարզերում, որոնք ակտիվորեն շարունակում են «SOS Մշակույթ» ծրագրի սկսած աշխատանքները: Նրանք հիմա ավելի լավ են ճանաչում իրենց մշակութային արժեքները և թույլ չեն տա ոչ մեկին վնասել դրանք: Նրանք նաև փորձում են ակտիվորեն իրենց գիտելիքներն ու փորձը փոխանցել սեփական և հարևան համայնքների այլ երիտասարդների, որպեսզի համատեղ ուժերով ավելի մեծ աշխատանքներ կատարեն: Նրանք շատ ակտիվ են իրենց համայնքներում, փորձում են մասնակցել և իրենց ներդրումն ունենալ հասարակական, քաղաքական, տնտեսական և մշակութային խնդիրների լուծմանը:
Այսքանով կարելի է ասել, որ «SOS Մշակույթ» ծրագիրը հասավ իր հիմնական նպատակներին: Արդյունքները շատ գոհացուցիչ էին, և որ ամենակարևորն է՝ իր ավարտից հետո էլ համայնքներում առողջ մտածելակերպ ունեցող և գիտակից երիտասարդները կշարունակեն մշակութային արժեքների պահպանությամբ զբաղվել և փորձել լուծումներ գտնել առաջացած տարբեր խնդիրների համար:
